Ғибратты әңгімелер: "КІМ КІМНЕН ТАРАЙДЫ?"

Читаем

Ғибратты әңгімелер: "КІМ КІМНЕН ТАРАЙДЫ?"

3 октября, 17:14

- Апа! – деді бір күні кішкентай Мішім. – Біздер осы Жолбарысқа қатты ұқсаймыз. Соған қарағанда Мысықтар солардан тараған болуы керек.

- Неге біз жолбарыстан тараймыз? – деді апасы жұлып алғандай, ренжи сөйлеп. – Біз олардан емес, олар бізден тарайды! Ғылыми кітаптардың өзінде Жолбарыстар Мысық тұқымына жатады деп кесіп айтқан.

- Жолбарыс үлкен, біз кішкентаймыз ғой. Әдетте кішкентайлар үлкендерден тарамай ма?!

- Үлкен болса ше?! Онда тұрған ештеңе жоқ! Біз де – Мысық, олар да – Мысық. Бірақ біздер адамдармен ерте жақындасып, мәдениетке ертерек қол создық та, үй хайуанына айналдық. Ал олар сол баяғы жабайы күйлерінде қала барды! Өркениет деген сөз олардың ойына да кіріп шықпайды. Жылы пеш, жұмсақ диван бізге бұйырған... Әй, қойшы соларды! Жабайының аты жабайы! Кейде біреулер оларды бізбен аталас, туыс дегенде... қатты намыстанам!

(Қадыр Мырза Әли, «Ғибратнәмә» кітабынан)